Comezaron en Veterinaria as gravacións do programa de televisión 'O preguntoiro do Campus' coa participación dos universitarios

Localia Telelugo comezou este mércores no Auditorio da Facultade de Veterinaria a gravación do novo programa de televisión ‘O preguntoiro do Campus’, no que os universitarios de Lugo son os encargados de entrevistar a unha figura destacada do panorama local e autonómico.
No primeiro programa o entrevistado foi o actual presidente da Confederación Hidrográfica do Norte, Jorge Marquínez. O alcalde de Lugo, José López Orozco, e a vicepresidenta segunda da Deputación Provincial, Lara Méndez, ocuparon o atril do ‘preguntoiro‘ nas seguintes gravacións.
A condución do programa está a cargo de Salomé Pérez, presentadora da cadea, e no primeiro programa colaboraron tamén o decano da Facultade de Administración e Dirección de Empresas, José Díez de Castro, e o director da Escola Politécnica Superior, Javier Bueno. Así mesmo, participou tamén a decana da Facultade de Veterinaria, Ana Bravo Moral. A parte técnica está formada polos traballadores de Telelugo e por alumnos da Fundación TIC.
Os alumnos das diferentes facultades que integran o campus lucense son os protagonistas, xunto ao entrevistado, deste programa, xa que son os encargados de formular as preguntas que desexen. A entrada á gravación é libre. A emisión dos programas está prevista para o próximo ano e continuarán as gravacións en xaneiro.