Aberta a inscrición no ‘Senior Innovation Lab’
O ‘Senior Innovation Lab’ conforma unha experiencia educativa no ámbito das persoas maiores, orientada ao deseño de novas solucións aos retos e oportunidades dunha sociedade envellecida. Organizada mediante seminarios e talleres prácticos planificados sobre innovación social, produto mínimo viable, comunicación efectiva e traballo interdisciplinario, esta iniciativa desenvolverase no Centro de Estudos Avanzados do 21 de outubro ao 25 de novembro. O alumnado de grao e mestrado pode formalizar a inscrición nesta ligazón. No caso do estudantado de doutoramento, a solicitude de praza pode realizarse premendo neste hipervínculo. Os e as estudantes de IV ciclo deben mandar un mail a IVciclo [at] usc.es (IVciclo[at]usc[dot]es) O prazo remata o 14 de outubro.
Esta é unha iniciativa do proxecto europeo INVENTHEI, que nesta segunda edición conta coa participación do Servizo de Participación e Integración Universitaria da USC (SEPIU), da Escola de Doutorado Internacional (EDIUS) e do IV Ciclo Universitario, de cara a promover unha experiencia de deseño interxeracional e aberta a toda a comunidade universitaria. Está recoñecida pola EDIUS como formación para o alumnado de doutoramento, e con 2 créditos ECTS para alumnado de grao. Os grupos de deseño interxeracional trallarán con distintas entidades do sector xerontolóxico e social para dar resposta ás súas necesidades. As entidades colaboradoras son AGADEA Alzheimer, ATEGAL, Cruz Roja, DomusVi e ARC Os Tilos.
“O envellecemento da poboación e un fenómeno solidamente constatado, e que alcanza en rexións europeas como Galicia un carácter progresivo e consolidado”, explican dende a organización. “A distribución demográfica por idade supón novas realidades para a empregabilidade e o emprendemento, e tamén novas necesidades de coñecemento nos diferentes eidos científicos e académicos. Arredor do envellecemento da poboación xorden estratexias específicas de innovación e transferencia que buscan ir máis alá dos estereotipos negativos sobre envellecemento patolóxico, dependencia e demencia asociados á idade avanzada”, engaden. Senior Innovation Lab é unha experiencia educativa no ámbito das persoas maiores, consistente nunha serie de seminarios presenciais e traballo en liña, que busca favorecer a adquisición de coñecementos e ferramentas de innovación por parte do alumnado da USC para desenvolver novas solucións aos distintos retos e oportunidades dunha sociedade envellecida.