O proxecto NeoGiANT define os retos máis inmediatos no impulso da economía circular no sector do viño
A segunda asemblea xeral do proxecto NeoGiANT botou a andar este mércores 23 e esténdese ata o venres 24 de novembro, na localidade belga de Gante. Nas sesións os participantes actualizarán o estado do proxecto logo do primeiro ano de traballo e establecerán a axenda para os vindeiros seis meses. NeoGiANT (The power of grape extracts: antimicrobial and antioxidant properties to prevent the use of antibiotics in farmed animals) pretende desenvolver un conxunto de novos produtos para animais —alimentos, profilácticos e diluíntes de esperma— baseados en extractos naturais. Deste xeito, aspírase a diminuír o uso de antibióticos na cría e substituír os conservantes sintéticos. Estes novos produtos levarán como ingrediente activo un extracto de bagazo de uva blanca (e-Vitis), obtido de Vitis vinifera, concretamente da variedade Albariño, mediante unha técnica de extracción sostible e patentada.
Este proxecto internacional do programa H2020 está coordinado pola catedrática de Química Analítica da USC Marta Lores. O consorcio atópase integrado por 20 socios de nove países, dos cales catro son institucións de educación superior —alén da USC, toman parte as universidades de Porto, Berlín e Bohemia do Sur na República Checa—. O equipo da USC está formado polos investigadores Carmen García Jares, Trinidad de Miguel, Sandra Sánchez, Patricia Díaz, Roberto Bermúdez e Maribel Quiroga.
“A proposta baséase na valorización de residuos da industria vitivinícola (co-produtos) procedentes da produción de viños brancos de alta calidade que conservan, tras o proceso de vinificación, unha importante carga dos compostos bioactivos orixinalmente presentes na uva”, explica a profesora Lores. Co fin de obter un extracto multicompoñente listo para o seu uso dun modo eficiente e “verde”, aplícase unha metodoloxía alternativa á extracción convencional que é, ademais, facilmente escalable. Así obtéñense ingredientes funcionais en sistemas de produción sostibles que contribúen a implementar accións de economía circular no sector do viño. “O obxectivo último do proxecto é reducir a aparición de novas resistencias antimicrobianas e controlar mellor as resistencias antimicrobianas existentes no eido da cría e reprodución de animais destinados ao consumo humano”, sinala a responsable do proxecto.
“As excelentes propiedades do extracto natural, baseadas nos polifenois bioactivos da uva Albariño, proporcionarán protección antimicrobiana e antioxidante aos animais, mellorando o seu benestar e rendemento e actuando como terapias preventivas”, continúa a profesora Lores. Os produtos que se desenvolvan estarán deseñados para controlar un bo número de enfermidades infecciosas de grande importancia na produción animal, tanto en gandería —bovina, porcina e avícola— como en acuicultura; pero non só para evitar o crecemento de microorganismos, senón para mellorar a saúde e o benestar dos animais, aumentando así ademais a rendibilidade das instalacións gandeiras e das piscifactorías.
