A Semana Galega de Cooperación Universitaria ao Desenvolvemento profunda no potencial transformador das universidades públicas
A segunda xornada da Semana Galega de Cooperación Universitaria ao Desenvolvemento bota a andar en Compostela este mércores 10 de maio no Salón de Graos da Facultade de Ciencias Políticas e Sociais da USC. O encontro, promovido pola Rede Galega de Cooperación Universitaria ao Desenvolvemento (RGCUD) que conforman UVigo, USC e UDC, reúne os principais actores da cooperación na contorna universitaria co obxecto de reforzar o papel das institucións públicas como axentes de cooperación e crear sinerxías conxuntas que xeren efecto multiplicador das accións desenvolvidas no marco da Axenda 2030. “Tratarase de consolidar a cultura de cooperación e coordinación na a través de espazos e dinámicas estables de diálogo, planificación e coordinación e a posta en valor das capacidades e talentos específicos de cada Universidade”, apuntan dende a organización.
O programa desta segunda xornada arranca ás 9.00 horas coa conferencia de María Luz Ortega Carpio, economista especializada en Desenvolvemento, EpD e Axenda 2030 e profesora da Universidade Loyola de Andalucía, arredor da 'ODS, docencia e educación para a cidadanía global'. A seguir, terá lugar a mesa redonda 'A institucionalización da educación para a cidadanía global'. Máis tarde, a profesora da USC Silvana Longueira presentará os resultados do proxecto 'Alumnado universitario comprometido coa Axenda 2030 e o seu potencial de transformación do sistema', o que dará paso a un panel de experiencias, que pechará a xornada de mañá. A sesión da tarde arrancará ás 16.00 horas coa actividade dos grupos de traballo en 'A educación para a cidadanía global nas unidades técnicas de cooperación das universidades. Creando rede', dirixido a persoal técnico; ' A Axenda 2030 na aula. Retos e oportunidades', dirixido a docentes e 'ODS e formación', dirixido ao alumnado.
Esta xornada dá continuidade á celebrada na Universidade de Vigo o martes 9 e irá seguida por unha última sesión na Universidade da Coruña o xoves 11. Dirixida ao persoal docente e investigador, ao estudantado, persoal universitario de servizos e administración así como a traballadores e traballadoras das entidades sociais e ao público en xeral con interese na cooperación universitaria ao desenvolvemento (CUD), a asistencia é libre previa inscrición. O programa completo da Semana Galega de Cooperación Universitaria ao Desenvolvemento está dispoñible na web da actividade.