A comunidade universitaria da USC ante a situación en Palestina: polos dereitos humanos, a democracia e a paz na Franxa de Gaza

A Universidade de Santiago de Compostela quere reiterar o seu posicionamento de rexeitamento á escalada bélica na Franxa de Gaza, como quedou de manifesto o pasado 30 de novembro de 2023 coa declaración institucional aprobada polo Claustro Universitario no que se trasladaba “a solidariedade ás comunidades universitarias e científicas así como ao conxunto da poboación civil”.

“En relación coa terrible situación que se está a vivir en territorio palestino, dende a Universidade de Santiago de Compostela demandamos o cesamento dos crimes de guerra, a fin do bloqueo humanitario e a retirada de tropas israelís en Gaza e Cisxordania”, afirmaba o manifesto. “Por suposto, a comunidade universitaria chama ao cumprimento estrito da legalidade internacional e dos dereitos humanos. Consideramos que estas condicións son garantes para a consecución da única situación admisible, a paz en Palestina”, engadía.
 
Por todo isto, dende a Universidade de Santiago de Compostela “demandamos o alto o fogo inmediato sobre estes territorios, así coma o apoio oficial e institucional á Corte Penal Internacional para investigar os crimes de guerra e de lesa humanidade”, concluía o texto.

Consello do Estudantado
No mesmo senso pronunciouse este xoves o Consello do Estudantado da USC, que nun comunicado advirte que “calquera política non enfocada ao cese da loita armada en Palestina e na reparación dos agravios cometidos contra o seu pobo é contraria aos valores que representa a universidade, e moi particularmente a nosa, que ten por función potenciar "unha educación baseada nos principios democráticos, a defensa da paz e dos dereitos humanos".

Neste contexto, o órgano de representación das e dos estudantes da USC quere sumarse ás voces “que berran pedindo o cese inmediato do conflito armado e a recuperación de vías diplomáticas en cumprimento do Dereito Internacional, coa fin de evitar un maior sufrimento, e restaurar progresivamente unhas condicións dignas para que, non só o estudantado, senón todo o pobo de Palestina, poida vivir en paz na súa terra”.

Comunicado CRUE
Agora, dado o agravamento do conflito e as penosas consecuencias que está a ter para a poboación palestina, tal e como advertiu este xoves nun comunicado CRUE Universidades Españolas, da que a USC forma parte e por tanto asume novamente, “as universidades estamos profundamente conmovidas” e por iso “facemos noso o sentir dos nosos campus e a reivindicación que desde eles se está estendendo para que, desde distintas instancias, se adopten medidas que poñan freo á escalada de violencia”, o que pasa polo cese inmediato e definitivo das operacións militares israelís así como de calquera acción de carácter terrorista e o respecto do dereito internacional por parte de Israel.

Ademais, a USC e o resto das Universidades do Estado comprométense a revisar e, de ser o caso, suspender as colaboracións con universidades e centros de investigación israelís que non expresasen un firme compromiso coa paz e o cumprimento do dereito internacional humanitario. Ademais, intensificarán a cooperación co sistema científico e de educación superior palestino e ampliarán os programas de cooperación, voluntariado e atención á poboación refuxiada. Á súa vez, manifestan o “compromiso de velar por que non se produzan condutas de antisemitismo ou islamofobia nin de calquera outro comportamento de odio no seno das comunidades universitarias”.