A nova edición do programa Faíscas Culturais é unha reflexión sobre como as nosas relacións afectivas, tanto políticas como persoais, estanse transformando coa aparición dos medios dixitais
O programa Faíscas Culturais é unha iniciativa da Vicerreitoría de Estudantes e Cultura que ten como obxectivo prender a reflexión cultural nas aulas da USC e complementar a formación do estudantado a través de intervencións e actividades de carácter cultural. Baixo o título 'i-Emotions: Afectos Dixitais', esta edición do programa é unha reflexión en torno á exposición 'Afectos Dixitais' sobre como as nosas relacións afectivas, tanto políticas como persoais, estanse transformando coa aparición dos medios dixitais.
O 5 de decembro, en quendas de 10.45 a 11.45 e de 12.15 a 13.30 horas, o estudantado da materia Socioloxía da Educación da Facultade de Ciencias da Educación, nunha actividade coordinada polo profesor Jorge García Marín, realizará unha visita á exposición no Salón Artesoado do Colexio de Fonseca para facer unha discusión crítica desde unha perspectiva da socioloxía.
A entrada é aberta para toda a comunidade universitaria.
