A USC amosa a oferta académica e os servizos do campus de Lugo a estudantes de ensino medio nunha xornada de achegamento
Uns 400 estudantes de ensino medio procedentes de distintos centros educativos da provincia de Lugo (IES A Pinguela de Monforte de Lemos, IES Nosa Señora dos Ollos Grandes de Lugo, IES Muralla Romana de Lugo, IES de Monterroso e IES Nosa Señora da Asunción de Sarria) visitaron este xoves os distintos centros universitarios da USC radicados no campus lugués a través do programa Encontros no campus de Lugo, unha xornada orientada a dar a coñecer a oferta de estudos e servizos da USC na sede universitaria luguesa a estudantes preuniversitarios, organizada ao abeiro do programa ‘A Ponte entre o Ensino Medio e a USC'.
O vicerreitor de Coordinación do campus de Lugo, Javier Bueno, e o coordinador do programa ‘A Ponte’ no campus de Lugo, Francisco Javier López, foron os encargados de dar a benvida ao estudantado preuniversitario nun acto desenvolvido no auditorio da Facultade de Veterinaria, onde Bueno e López, fixeron unha presentación xenérica do campus de Lugo da USC, antes de que varios estudantes universitarios ofreceran aos asistentes a súas particulares visións do campus de Lugo e relataran algunhas das experiencias vividas no seu periplo como estudantes da USC.
Bueno destacou na súa intervención as múltiples oportunidades e as vantaxes que ofrece ao estudantado o campus de Lugo, unha sede universitaria cada vez máis internacional e na que este curso formalizaron a súa matrícula 140 alumnos estranxeiros, dixo. O vicerreitor de Coordinación do campus de Lugo apuntou tamén algún dos obxectivos que pretende a USC para a súa sede luguesa a través do proxecto de especialización Campus Terra, ao tempo que destacou o marchamo de calidade que implican os títulos universitarios expedidos pola USC, unha universidade que esixe a todos os graduados e graduadas acadar o certificado B1 de competencias en lingua inglesa para superar con éxito a súa correspondente titulación universitaria. Unha vez rematada esta sesión, os escolares, distribuídos en grupos en función das súas preferencias formativas e acompañados de estudantes e profesores universitarios, completaron itinerarios de visitas ás distintas facultades e escolas do campus de Lugo, ademais de facer un percorrido polas instalacións da Biblioteca Intercentros. O obxectivo desta xornada, segundo explicou Francisco Javier López, é o de dar a coñecer ao alumnado preuniversitario a oferta académica e de servizos que presenta a USC en Lugo, “un campus moderno, pero aínda moi pouco coñecido”, dixo. O coordinador do programa ‘A Ponte’ no campus de Lugo adiantou asemade que a sede universitaria luguesa celebrará outras dúas xornadas de encontros con estudantes de ensino secundario nos vindeiros meses e nas que se prevé a participación doutros 400 estudantes. Bueno e López deron a benvido a estudantes e profesores de ensino medio que participan nos 'Encontros no campus de Lugo?
