Carmen Rivas Fraga gaña a cuarta edición do certame de pintura Crearte

O xurado da cuarta edición do certame de pintura CreArte que convoca a Facultade de Ciencias Económicas e Empresariais decidiu premiar a obra ‘O que declina’ de Carmen Rivas Fraga, que ademais dos 600 euros do premio verá cómo o cadro pasará a formar parte do patrimonio da Facultade, sendo exposta durante un ano no seu ‘Espazo de Arte’ reservado para tal fin. Nesta ocasión o xurado que resolveu estivo formado polo decano da Facultade de Xeografía e Historia, Juan Manuel Monterroso; o artista plástico Xurxo Martiño; a comisaria de exposicións Cristina Carballedo; e a decana da Facultade convocante, Emilia Vázquez. As obras presentadas ao concurso estarán expostas na entrada da Facultade durante un mes, e o premio a Carmen Rivas será entregado o próximo mércores 8 ás 12.00 horas, dentro dos actos de celebración do patrón do centro. O certame de pintura CreArte convócase coa intención de potenciar e difundir a creación artística dos membros da comunidade universitaria e, nesta cuarta convocatoria, tamén á sociedade en xeral. Para participar no concurso débese presentar unha única obra inédita de temática e técnica libres e dunha dimensión non inferior a 50x50 centímetros nin superior a 120x120.