Clausura da quinta edición do máster en Enxeñaría da Madeira Estrutural na Escola Politécnica Superior

A Escola Politécnica Superior do campus de Lugo da USC acollerá este venres 26 de xuño, a partir das 17.30 horas, a clausura da quinta edición do máster en Enxeñaría da Madeira Estrutural, un posgrao propio da USC organizado pola Plataforma da Madeira Estrutural (Pemade), en colaboración con Confemadera Hábitat Galicia e dirixido polo catedrático da USC Manuel Guaita.

A clausura deste máster celebrarase no salón de actos da EPS, no marco dunha sesión na que participarán, ademais de Manuel Guaita, o presidente de Confemadera Hábitat Galicia, Elier Ojea, o director do Departamento de Enxeñaría Agroforestal da USC, Ramón Velo Sabín, e o tamén profesor da USC Juan Ortiz Sanz, quen intervirá en calidade de presidente do tribunal encargado de fallar os premios aos mellores proxectos de fin de máster.