Profundan na construción dos ámbitos da educación nun congreso científico en Santiago

Toda a educación depende da nosa actividade interna que debe ser determinada cara á finalidade educativa, algo que se fundamenta desde a Pedagoxía, cuxo reto é transformar a información en coñecemento e o coñecemento en educación. Todas as actividades son utilizadas para educar, porque calquera tipo de influencia non é educación, pero si pode ser transformada nunha influencia educativa. Partindo desta premisa, especialistas de universidades e centros de investigación de Iberoamérica participan estes días no Simposio Internacional de Educación ‘Pedagoxía e construción de ámbitos de educación. A función de educar’ que se desenvolve no Salón de Actos da Facultade de Ciencias da Educación (Campus Vida). No encontro, que comezou coa conferencia inaugural ‘A educación é un novo nacemento’ a cargo do coordinador da Rede Internacional de Pedagoxía da Alteridade (RIPAL-REDIPE), Pedro Ortega Ruíz, traballarán sobre cada un dos elementos estruturais da intervención atendendo a postulados pedagóxicos que fan posible entender a relación co outro e a construción de ámbitos de educación. Trátase, en suma, de achegar coñecemento sobre a relación educativa, os axentes e a función de educar. Logo da apertura, que presidiu o reitor Juan Viaño, deron comezo as sesións de relatorios nas que se estrutura o encontro: Educación internacional e interculturalidade; Educación, lingua e cultura; Pedagoxía Mesoaxiolóxica; Pedagoxía da Alteridade; Educación para a paz; Innovación educativa; Inclusión, diversidade e valores; e Educación e pedagoxía: Proxectos, programas, reflexións, experiencias, modelos, metodoloxías.

Este evento científico está organizado pola Rede Internacional de Pedagoxía (REDIPE) e o Grupo de Investigación Terceira Xeración da USC que dirixe José Manuel Touriñán, encargado de clausurar o encontro o xoves ás 10.00 horas cunha conferencia titulada ‘Concepto de educación e construción de ámbitos: a perspectiva da pedagoxía mesoaxiológica’. O evento está patrocinado polo Instituto de Ciencias da Educación (ICE), a Rede Internacional de Pedagoxía Mesoaxiolóxica (RIPEME), a Rede Internacional de Pedagoxía da Alteridade (RIPAL), The International Institute for Hermeneutics, a Sociedade Internacional de Filosofía (SIFA), a Rede de redes académicas UABC-REDIPE , o Centro de Creatividade e Innovacións Educativas, o Centro de Supercomputación de Galicia e a rede de investigación REDICIS.