Traballo Fin de Máster

O Traballo de fin de máster (TFM) consiste na elaboración e defensa dun traballo académico que sintetice o conxunto de competencias desenvolvidas no Mestrado e no que se integren aprendizaxes dos seus módulos formativos -singularmente do Prácticum- e un traballo de investigación ligado ao exercicio docente na especialidade correspondente.

Os seus obxectivos son:
1.- Introducirse na investigación educativa identificando temas relevantes, contextos ou poboacións susceptibles de estudo e metodoloxías axeitadas para a súa indagación.
2.- Utilizar estratexias de busca e selección de información e facer un uso apropiado da mesma.
3.- Integrar os saberes derivados das ciencias da educación na interpretación das temáticas ou realidades analizadas.
4.- Redactar textos académicos correctos, coherentes e adecuados, e facendo uso dos formalismos que lles son propios.
5.- Realizar presentacións orais facendo un bo uso dos recursos expositivos e argumentativos da lingua, así como dos apoios electrónicos ou multimedia pertinentes.
6.- Entender o estudo, a reflexión e a investigación educativa como estímulo e como garantía de mellora no exercicio profesional.

1.- Identificación de temas de investigación educativa, de contextos de análise e de metodoloxías.
2.- Selección / elaboración e utilización de instrumentos ou estratexias para o estudo de temáticas ou problemáticas educativas concretas.
3.- Uso de fontes bibliográficas, electrónicas ou doutro tipo para extraer a información requirida.
4.- Interpretación dos datos obtidos á luz dos saberes educativos e doutros estudos sobre temáticas similares.
5.- Elaboración de textos académicos con atención ás características discursivas e aos requisitos formais (citas bibliográficas, etc.) que os definen.
6.- Coñecemento e utilización dos recursos orais, electrónicos ou multimedia axeitados para a exposición e defensa pública do traballo.

A bibliografía utilizada quedará determinada polo propio TFM, polas orientacións do titor/a do mesmo e pola busca bibliográfica do alumnado.

Competencias xerais:
- Buscar, obter, procesar e comunicar información (oral, impresa, audiovisual, dixital ou multimedia), transformala en coñecemento e aplicala aos procesos de ensinanza e aprendizaxe nas materias propias da especialización cursadas.
- Participar na avaliación, investigación e na innovación dos procesos de ensinanza e aprendizaxe, comunicando as súas conclusións e as razóns que as sustentan á comunidade educativa e outros profesionais da educación.

Competencias específicas:
- Integrar a formación en comunicación audiovisual e multimedia no proceso de ensinanza-aprendizaxe.
- Coñecer e aplicar propostas docentes innovadoras no ámbito da especialización cursada.
- Analizar criticamente o desempeño da docencia, das boas prácticas e da orientación, utilizando indicadores de calidade.
- Identificar os problemas relativos á ensinanza e aprendizaxe das materias da especialización e formular alternativas e solucións.

Competencias específicas asociadas ao Prácticum:
- Acreditar un bo dominio da expresión oral e escrita na práctica docente.
- Participar nas propostas de mellora nos distintos ámbitos de actuación a partir da reflexión sobre a práctica.

Competencias transversais:
- Utilizar bibliografía e ferramentas de busca de recursos bibliográficos xerais e específicos, incluíndo o aceso por Internet.
- Xestionar de forma axeitada o tempo de traballo e organizar os recursos dispoñibles, establecendo prioridades, camiños alternativos e identificando erros lóxicos na toma de decisións.

Na elaboración e defensa do Traballo de fin de máster distínguense varias fases. A súa explicación detallada aparece na Guía do TFM que se entregará e explicará oportunamente ao alumnado e que aparece na páxina web.
Todo o proceso será orientado polo director/a do TFM, de acordo coas indicacións que se establecen na dita Guía.

Esas fases e as tarefas asociadas a cada unha son, de maneira sintética, as seguintes:
1.- Fase de preparación:
- Asignación do profesor/a do Máster que se encargará da titorización e dirección.
- Selección do tema, problema ou suposto no que se vai centrar o traballo.
- Planificación: selección da metodoloxía, poboación, corpus..., e do soporte bibliográfico ou das fontes de información que proceda.
2.- Fase de elaboración:
- Indagación sobre o tema, suposto ou problema educativo: busca de información bibliográfica, aplicación de instrumentos de indagación, etc.
- Tratamento e análise da información obtida, relación con outros traballos previos, etc.
- Textualización de acordo coa estrutura e os requisitos formais propios dun traballo académico.
3.- Fase de defensa:
- Preparación: elaboración de guión da presentación e dos apoios tecnolóxicos necesarios.
- Presentación e defensa diante da comisión avaliadora.

As Comisións de avaliación emitirán a cualificación obtida por cada TFM, que será a media aritmética das emitidas polos seus tres membros, utilizando unha escala de 0 a 10.
As Comisións avaliadoras que consideren que algún TFM con cualificación superior a 9 é merecedor de Matrícula de Honra deberán presentar unha proposta na coordinación do Máster. Se o número de traballos propostos é igual ou inferior ao autorizado, a distinción concederáselles a todos; se é superior, a asignación farase de acordo cos criterios establecidos pola Comisión Académica do Máster.

Os criterios básicos para a avaliación dos traballos serán os seguintes:
- Rigor na textualización: cumprimento dos apartados sinalados na "Guía do TFM", utilización dos estándares de citación bibliográfica, coherencia e cohesión na organización discursiva, e corrección e adecuación lingüística.
- Calidade do contido: Relevancia, dificultade e orixinalidade da temática elixida, nivel e profundidade no seu tratamento, calidade e pertinencia do marco teórico, dos apoios bibliográficos, da metodoloxía empregada, etc.
- Relación coas competencias formativas do Máster e contribución á mellora da práctica docente, á calidade da educación e ao coñecemento científico ou profesional no tópico tratado.
- Presentación e defensa: claridade e precisión da presentación, uso de medios e tecnoloxías adecuados, resposta e aclaracións ao membros da Comisión.
Estes criterios ponderarán de maneira equitativa na cualificación final, pero esixirase unha puntuación mínima en todos eles.

Os TFM deberán ser orixinais e non poderán reproducir total nin parcialmente outros traballos sen citalos adecuadamente. O uso fraudulento de información implicará a cualificación de suspenso na convocatoria correspondente.

O TFM é unha materia de 6 ECTS (150 horas), que se distribúen en sesións de traballo presencial co director/a do TFM ao longo de todo o proceso e de traballo individual do alumnado organizado arredor das fases e tarefas que se indican no apartado "Metodoloxía de ensinanza" deste Programa.

A metodoloxía de traballo que se utilizará demanda:
- A implicación directa do alumnado na súa propia aprendizaxe.
- Unha comunicación e coordinación ben pautada co/coa titor/a do TFM.
- Unha planificación temporal rigorosa e o compromiso co seu cumprimento.

- Responsabilidade medioambiental:
o Evitar tapas de plástico ou outros envoltorios externos innecesarios.
o Sempre que sexa posible, empregar grampas en lugar de encadernación.
o Imprimir a dúas caras en calidade “aforro de tinta”.
o Non empregar folios en branco como separadores de capítulos ou partes.
o Evitar anexos que non teñan referencia directa cos temas desenvolvidos.

- Perspectiva de xénero:
o Recoméndase facer uso da linguaxe non sexista, tanto no traballo cotiá de aula como nos traballos académicos encomendados. Pode obterse información ao respecto no enlace: http://www.usc.es/export/sites/default/gl/servizos/oix/descargas/lingua…

- Obrigatoriedade de uso da conta de correo rai.

- Obrigatoriedade de emprego das ferramentas tecnolóxicas institucionais: Campus Virtual, Microsoft Office 365, e outras ferramentas facilitadas pola facultade e autorizadas como ferramentas institucionais pola universidade.

- Non se poderá empregar o de teléfono móbil, salvo cando se use como instrumento de traballo seguindo as indicacións dadas polo docente, responsabilizándose o alumnado das consecuencias legais e académicas que podan derivarse dun emprego non axeitado do mesmo.

- Ter en conta que o ensino-aprendizaxe (clases / titorías) é un proceso privado, enténdase privado como proceso de comunicación e intercambio entre o/a docente e o estudantado matriculado na materia.

- Obrigatoriedade do cumprimento da normativa de protección de datos https://www.usc.gal/es/politica-privacidad-proteccion-datos