Premio Nobel "polo desenvolvemento de métodos para arrefriar e atrapar átomos con luz láser".
Claude Cohen-Tannoudji é un físico francés de orixe alxeriana, pioneiro en métodos de arrefriamento de átomos con feixes de láser. As técnicas desenvolvidas por Cohen-Tannoudji e outros científicos, como William Phillips e Steven Chu, foron esenciais para fabricar reloxos atómicos máis precisos. En 1962 rematou o seu doutoramento na École Normale Supérieure (ENS) en París, Francia e en 1973, no CNRS, comezou un extenso traballo como director de física atómica e nuclear no Collège de France, en París.
Cohen-Tannoudji foi un dos primeiros en propoñer o bombardeo de átomos con luz coherente para desaceleralos. En 1985, Steven Chu, seguindo estas propostas, arrefriou un feixe de átomos a unha temperatura de 240 millonésimas de Kelvin por riba do cero absoluto, o que supoñía unha velocidade dos átomos de 0,5 km/h. En 1988 William D. Phillips acadaba unha temperatura de 40 millonésimas de grao por riba do cero absoluto. En 1995, Cohen-Tannoudji rebaixou a temperatura ata 0,2 millonésimas de grao por riba do cero absoluto.
A manipulación e control de átomos permitiu dende entón aos científicos facer melloras en moitas tecnoloxías. O exemplo máis destacado son os reloxos atómicos, que son tanto máis precisos canto maior sexa o control sobre os átomos usados para medir o tempo. Unha maior precisión dos reloxos atómicos mellora a navegación espacial e os sistemas GPS. Apreixoar átomos tamén é útil para medir a forza da gravidade nun determinado lugar na Terra, eo seu control abriu as portas á computación cuántica.
