Oficina de Proxección Internacional

A Oficina de Proxección Internacional coordina a actividade de proxección exterior da USC garantindo a súa articulación coa misión e xestión institucional. Entre as súas funcións inclúense a identificación de prioridades estratéxicas no eido da internacionalización e a promoción de convenios e relacións de colaboración con organismos e institucións de educación superior internacionais, así como a participación en alianzas, redes, asociacións e foros educativos estratéxicos a nivel mundial.

A Oficina de Proxección Internacional xestiona así mesmo as actividades de captación de estudantado internacional. Con este obxectivo, desenvolve iniciativas e programas específicos e fomenta a difusión da oferta académica da USC e a súa visibilidade a través de accións de promoción e representación internacional.

Ofrece ademais asistencia na atención e acollida ao estudantado visitante de universidades estranxeiras (free-mover), ao estudantado internacional con matrícula en programas oficiais da USC, así como ao persoal docente e investigador internacional, neste caso a través do Centro Galego de Mobilidade de Investigadores da Rede Europea EURAXESS, que se integra dentro da Oficina.