Salón de Graos
A decana da Facultade de Ciencias Políticas e Sociais, Marta Lois González, tomará posesión do seu cargo nun acto oficial que, baixo a presidencia do reitor Antonio López, se desenvolverá o martes 28 ás 13.00 horas no Salón de Graos do centro.
Marta Lois González foi elixida decana o pasado mes de setembro, tomando así o relevo do profesor Ramón Bouzas. O seu equipo decanal está conformado por José Caamaño, de Economía Política, Amparo Novo, de Socioloxía, e Alba Alonso, de Ciencia Política.
Marta Lois
Doutora en Ciencia política e profesora do Departamento de Ciencia Política e Socioloxía, Marta Lois pertence ademais á Rede Armela de investigación en igualdade, dereitos e estado social. A súa investigación artéllase sobre unha serie de eixos complementarios que son a perspectiva de xénero e a análise das políticas públicas e a teoría política feminista.
Os seus traballos foron publicados en revistas e editoriais de referencia na disciplina, destacando Diz, I. / Lois, M. (2016) ‘El impacto de las cuotas sobre los ejecutivos autonómicos: presencia y características de la elite gubernamental autonómica’ en La Barbera; MC y Cruells, M (coords), ‘Igualdad de género y no discriminación en España: evolución, problemas y perspectivas’, Madrid: Centro de Estudios políticos y Constitucionales; Verge, T & Novo, A & Diz, I & Lois, M (2015), ‘Género y Parlamento: impacto de la presencia política de las mujeres’ en El poder político en España: Parlamentarios y ciudadanía en Madrid: CIS.
Ademais, coordinou libros de referencia na disciplina como Crisis, derechos sociales e igualdad con Alba Nogueira e Isabel Diz ou Ciencia política con perspectiva de género (Akal, 2014), que recibiu o Premio María Ángeles Durán de Investigación Científica.