Aberto o prazo de solicitudes do programa Stella do Grupo Compostela para a mobilidade do persoal administrativo universitario

Dirixido ao persoal administrativo das universidades, o Grupo de Compostela de Universidades mantén aberto ata o vindeiro día 17 o prazo de presentación de solicitudes do programa de mobilidade non académica Stella. Esta iniciativa promove intercambios dunha semana entre o persoal administrativo de universidade de todo o mundo. O intercambio de ideas, e a través disto, a mellora dos servizos é a finalidade deste programa de mobilidade do Persoal de Administración e Servizos, no que xa teñen participado dende a súa creación en 2002 preto de 250 persoas. Na anterior edición 31 universidades de Alemaña, Hungría, Italia, España, Malta, Polonia, Portugal, México, Perú, República Checa e Suecia se sumaron á iniciativa. Ademais, outorgáronse un total de dez bolsas de mobilidade para o programa intercontinental americano. Unha comisión directiva é a responsable de xestionar o proceso e distribuír as axudas económicas que concede o Grupo para as mobilidades. Intégrana a Erasmus Hagarschool Brussels (Bélxica), e as universidades de Masaryk (República Checa), Oulu (Finlandia), Guadalajara (México) e a de Vigo que ademais é a coordinadora do programa. Creado na USC no ano 1993, o Grupo Compostela conta na actualidade con máis de setenta institucionais asociadas procedentes de ata 23 países diferentes, que comparten como obxectivo a colaboración no ámbito educativo e científico.