A Aula de Teatro da USC estrea a súa última produción ‘Historia de Pura e Angelita. Pequeno divertimento mordaz’

A Aula de Teatro da Universidade de Santiago de Compostela estrea este martes, día 21, a súa última produción ‘Historia de Pura e Angelita. Pequeno divertimento mordaz’, dramaturxia libre do texto de Agustín Gómez. A función terá lugar ás 20:30 horas, no Salón Teatro (Rúa Nova, 34), sendo a entrada de balde, previo paso polo despacho de billetes, que abrirá ás 18:30. A obra, dirixida por Roberto Salgueiro, vaise representar ao longo deste curso, durante o que a Aula de Teatro da Universidade conmemora o vinte aniversario da súa creación.

‘Historia de Pura e Angelita. Pequeno divertimento mordaz’ é, segundo os seus creadores, un conto sobre un país asfixiado pola intolerancia, no que se trata de reflexionar sobre unha realidade, aínda que ambientada no ano 1959, non tan afastada no tempo.