Un coloquio na Casa do Saber de Lugo afonda nas características e as perspectivas de futuro da propiedade agraria en Galicia

Os días 16 e 17 de novembro a Casa do Saber de Lugo acolle o coloquio ‘A propiedade da terra: desde a historia para o futuro. 30 anos da publicación de La propiedad de la tierra en Galicia, 1500-1936, de Ramón Villares’, organizado polo Grupo de Historia Agraria e Política do Mundo Rural (Histagra) da USC e a Rede de Agroecoloxía ReVOLTA da USC e a Universidade de Vigo. A obra de Villares, publicada en 1982, segue a ser o referente no estudo do proceso histórico sobre a evolución da propiedade da terra en Galicia. Na rolda de prensa de presentación do encontro, que se celebra o xoves 15 ás 12.00 horas na Vicerreitoría de Coordinación e Planificación do Campus de Lugo, participan os investigadores da USC Eduardo Corbelle, xestor de ReVOLTA; Rafael Crecente, coordinador do Laboratorio do Territorio da USC; e Xoán Carlos Carreira, coordinador do grupo de investigación Construción Sostible para o Medio Rural e Natural (Cosmerun) da USC. Ademais da serie de relatorios e mesas redondas (a cargo de relatores da USC –entre eles o propio Ramón Villares– e outras universidades españolas, e doutros ámbitos como a investigación, a enxeñería ou a maxistratura), o coloquio inclúe tamén unha sesión de traballo de campo en varias parroquias do concello de Chantada.