Un curso de verán sobre turismo analizará formas de viaxar de xeito sostible

A Universidade de Verán 2018 ofrece un curso sobre Slow Tourism e formas de viaxar de xeito sostible entre os días 3 e 7 de setembro na Escola Superior de Enxeñería (Santiago). A matrícula pode formalizarse de xeito presencial ou a través da páxina web ata o próximo 24 de agosto.

O curso, dirixido por Rocío García Carregal, ten como obxectivo dar visibilidade ao impacto do turismo como ocupación territorial e uso dos recursos. Nas xornadas presentarase outra forma de xestión turística na que se faga fincapé no desenvolvemento económico e a sustentabilidade ambiental.

As xornadas inclúen contido sobre as implicacións económicas da xestión turística dende o desenvolvemento sostible e a ocupación territorial e xestión patrimonial, así como a pegada ecolóxica asociada ao turismo. Ademais, presentarán novas formas de turismo gastronómico, o turismo de natureza e voluntariado ambiental e as potencialidades do turismo astronómico.