Os Cursos de lingua e cultura galegas ‘Galego sen fronteiras’ comezarán o luns na Facultade de Filosofía con máis de 80 estudantes dunha vintena de países
Máis de 80 estudantes procedentes dunha vintena de países iniciarán o luns 3 de xullo o programa dos cursos de lingua e cultura galegas ‘Galego sen fronteiras’ que coa colaboración do Instituto da Lingua Galega da USC, a Secretaría Xeral de Política Lingüística e a Deputación da Coruña organiza a Real Academia Galega (RAG). Ata finais de mes a Facultade de Filosofía acollerá a alumnado procedente de Alemaña, Austria, Brasil, Reino Unido, Canadá, República Checa, Chile, Croacia, Cuba, Estados Unidos, Hungría, India, Italia, México, Polonia, Romanía, Portugal, Ucraína, Xapón e doutras autonomías do Estado español.
O acto inaugural celebrarase o luns 3 de xullo ás 12:30 horas na Facultade de Filosofía coas intervencións do presidente da RAG, Víctor F. Freixanes; da vicerreitora de Servizos Universitarios do Campus de Lugo, María do Carme Silva Domínguez; do secretario da RAG e codirector dos Cursos, Henrique Monteagudo; do director do ILG, Ernesto González Seoane; do secretario xeral de Política Lingüística, Valentín García; e da vicepresidenta da Deputación da Coruña, Goretti Sanmartín.
As sesións desenvolveranse ata o 24 de xullo na Facultade de Filosofía e combinarán as clases teóricas e prácticas con obradoiros de música e baile e palestras impartidas por persoas do mundo da literatura, a música ou a arte dramática. Unha charla-concerto de Uxía Senlle e Sérgio Tannus, un espectáculo sobre Carlos Casares a cargo do actor Avelino González, outra charla-recital da poeta e académica electa Chus Pato ou un percorrido pola cultura na Rede da man do director de culturagalega.gal, Manuel Gago, son parte do programa que completa as aulas teóricas e prácticas de lingua e cultura.
Os participantes poderán tamén gozar dunha visita á Casa-Museo Rosalía de Castro, guiada por Anxo Angueira, que concluirá cunha conferencia da profesora Catherine Davies, directora do Instituto de Investigación en Linguas Modernas da Universidade de Londres.