O futuro do ensino xógase nos MOOC

O vindeiro 21 de xullo Stephen Downes, un dos máis reputados e influentes investigadores no campo da aprendizaxe electrónica e considerado como o creador do primeiro MOOC (Curso en Liña Masivo e Aberto), impartirá unha conferencia no CiTIUS na que explicará o concepto orixinal deses cursos e ilustrará o seu impacto actual no terreo do e-learning e, en particular, na aprendizaxe social. Esa conferencia enmárcase no curso de verán da USC ‘MOOC e aprendizaxe en redes sociais’ que terá lugar entre o 21 e o 24 de xullo e que conta co patrocinio da rede de investigación TELGalicia. Dirixido polos docentes Adriana Gewerc Barujel e Manuel Lama Penín, ten como obxectivo presentar a situación actual e as perspectivas futuras dos MOOC dende dous puntos de vista necesariamente complementarios: o pedagóxico e o tecnolóxico. O prazo de matrícula remata este venres 10. Ademais de Stephen Downes, o curso conta con conferencias impartidas por prestixiosos pedagogos como a directora do Institute of Learning Innovation da Universidade de Leister, Gráinne Conole, e o director do Centre d' Educació i Noves Tecnologies dá Universitat Jaume I de Castelló, Jordi Adell Segura. Participan tamén recoñecidos investigadores no campo do e-learning como Carlos Delgado Kloos, da Universidade Carlos III de Madrid, e Martín Llamas Nistal, da Universidade de Vigo. O curso completarase cunha serie de talleres prácticos impartidos por profesionais con recoñecida experiencia no deseño e desenvolvemento deste tipo de cursos, como David Álvárez Jiménez, de Conecta13, e Mercedes Rei Fandiño, da empresa Teltek Video Research.