Un grupo de estudantes da USC achegarase aos empresarios e directivos máis importantes do panorama financeiro e empresarial español

Un grupo de estudantes da USC participará a vindeira semana, o martes 2 e o mércores 3 no Programa de Acompañamento a Líderes Empresariais no marco da I Convención Nacional de Directivos da Asociación para o Progreso da Dirección (APD) que se celebra nesas datas en Santiago de Compostela. O programa dará a oportunidade aos universitarios de vivir unha experiencia a carón dalgúns dos representantes empresariais e directivos máis importantes do panorama financeiro e empresarial español. Así, os estudantes poderán achegarse aos máximos representantes de empresas como Coca Cola, Indra, FCC, Blusens, Vodafone España ou Deloitte, entre moitas outras, contando coa presenza de destacados directivos como o presidente de BBVA, Francisco González; o ex ministro de Asuntos Exteriores e actual presidente de Vueling, Josep Piqué; o presidente de Banco Pastor, José Mª Arias; ou a presidenta de Microsoft España, María Garaña, entre moitos outros.

Esta iniciativa enmárcase no proyecto “Os mozos no camiño do liderado directivo”, a través do que se busca un maior achegamento dos participantes á realidade do mundo empresarial no que desenvolverán a súa actividade profesional, un obxectivo compartido pola USC, que colabora no programa de acompañamento a líderes a través da Cátedra Mocidade Emprendedora. Dado o perfil dos participantes na Convención, o programa está dirixido, como futuros directivos, ao alumnado dos Másteres en Dirección de Empresas, en Banca e Finanzas así como ao estudantado de 5º curso de Administración e Dirección de Empresas.