Investigadores e profesionais profundan no deseño e xestión de produtos turísticos de calidade

A casa do Concello de Muros converterase os días 6 e 7 de setembro en punto de encontro para os estudosos e profesionais do deseño e a xestión de produtos turísticos de calidade, nun curso que vai dirixir o profesor Xosé Manuel Santos Solla co financiamento do propio concello de Muros e do Instituto Universitario de Estudos e Desenvolvemento de Galicia (IDEGA). Ao longo destas dúas xornadas estudaranse as particularidades e posibilidades do turismo rural, destinos idiomáticos en Europa, potencialidade do turismo de cruceiros en Galicia, alternativas e complementos ao turismo de litoral e novas tecnoloxías en xestión de produtos turísticos.

No desenvolvemento das sesións de debate intervirán ademais de especialistas universitarios galegos, representantes dos axentes implicados neste sector produtivo, coa presenza de redes de turismo rural, organismos públicos locais, fundacións e colectivos con interese na materia.