Ponse en marcha este mércores a quinta edición do programa de préstamo de bicicletas da USC

Por quinto ano consecutivo, a Coordinación do Plan de Desenvolvemento Sostible da Vicerreitoría de Responsabilidade Social e Calidade pon en marcha o Programa de préstamo gratuíto de 300 bicicletas dirixido a todos os membros da comunidade universitaria de Lugo e Santiago. O prazo para presentar solicitudes comeza este mércores, 3 de novembro, e durará ata ás 14:00 horas do día 18. Quen desexe participar terá que consultar o web do Programa e cumprimentar o formulario que aparece no apartado ‘Solicitudes de participación’. As persoas serán seleccionadas por estrita orde de solicitude, tendo preferencia tanto os estudantes Bolseiros de Sustentabilidade, Participación e Integración Universitaria nos centros docentes, como os Bolseiros de Aula Verde dos colexios maiores e residencias universitarias. As listaxes de persoas seleccionadas e de agarda serán publicadas no web do Programa nos días posteriores ao remate do período de solicitude. Xunto coa lista de concesións tamén se publicará o día e lugar onde cada persoa poderá recoller a súa bicicleta. O programa enmárcase nas diversas iniciativas nas que traballa a Coordinación do Plan de Desenvolvemento Sostible para o fomento do uso de medios de transporte alternativos ao automóbil, que permite unha redución das emisións de CO2 e busca acadar unha menor incidencia doutros problemas asociados ao tráfico, como son a contaminación acústica ou a excesiva ocupación de espazos. Anteriores convocatorias Durante os anos nos que o Programa de préstamo de bicicletas estivo en marcha, máis de 900 membros da comunidade universitaria gozaron dunha bicicleta en préstamo para realizar os seus desprazamentos aos centros de estudo ou traballo. Na pasada edición, un 81% dos participantes foron estudantes, un 7% persoal docente e investigador e un 6% persoal de administración e servizos. Descontos para mercar bicicletas Por outra parte, todas aquelas persoas da USC interesadas en adquirir unha bicicleta poderán facelo con vantaxes en Bicicletas Oliveira de Compostela e Hijos de Félix Latorre en Lugo presentando a tarxeta universitaria. Os servizos prestados por estas dúas empresas inclúen descontos tanto na adquisición de novas bicicletas como na de materiais complementarios para os ciclistas, de pezas de bicicletas e man de obra nos arranxos.