Portions of Economics, novo ebook nativo editado polo Servizo de Publicacións

A libraría dixital do Servizo de Publicacións da USC acaba de incorporar un novo ebook, Portions of Economics, a versión inglesa dos artigos sobre economía publicados en La Voz de Galicia polo profesor Manel Antelo entre 2008 e 2010. As reflexións do autor, profesor do Departamento de Fundamentos da Análise Económica da USC, cobren os máis importantes aspectos da crise que azouta Occidente dende o verán de 2007 así como dos axentes económicos que neste contexto teñen intervido con maior protagonismo.

Que o libro, que non se edita en papel, estea en inglés xustifica sobradamente a súa edición dixital nativa “que proporciona á obra un acceso planetario inmediato, ademais doutras razóns como o abaratamento de custos de produción” sinala o director do Servizo de Publicacións, Juan Blanco.