Procuran novos achegamentos á violencia de xénero dende distintas perspectivas

Os aspectos médico-legais e xurídico-penais da violencia de xénero centran este xoves 23 os debates dunha xornada organizada conxuntamente polo Departamento de Anatomía Patolóxica e Ciencias Forenses da USC, o Instituto universitario de Criminoloxía e o Colexio de Avogados de Santiago. Dirixido por María Sol Rodríguez Calvo e Fernando Vázquez-Portomeñe, o curso desenvolveuse na sede do Colexio de Avogados de Santiago, onde se inaugurou coa presenza, ademais dos directores, da secretaria xeral da USC Lourdes Noya. A Lei Orgánica 1/2004 de medidas de protección integral contra a violencia de xénero e a rehabilitación do maltratador foron as cuestións que abriron a quenda de intervencións, da man dos catedráticos de Dereito das Universidades Rovira i Virgili e de Valencia, Gonzalo Quintero e Enrique Orts, respectivamente. A xornada contempla ademais outras tres mesas de debate. Na primeira tratouse a situación actual da avaliación forense da violencia contra a muller, a pericia médico-legal na vítima e no agresor e a importancia da valoración do dano psíquico nas vítimas.

Xa pola tarde, a partir das 17:00 horas, na primeira mesa programada preséntase un avance de resultados dos estudos médico-legal e xurídico-penal realizados na USC sobre casos de violencia de xénero en Galicia e presentaranse protocolos autonómicos de aplicación en casos de violencia de xénero. Por último, no último debate analizase os problemas de aplicación dos delitos de violencia de xénero.