A revista 'Papers on Joyce' publica un novo número

A revista académica internacional Papers on Joyce, que edita a profesora da USC Margarita Estévez Saá e Carmelo Medina, da Universidade de Xaén, acaba de publicar un novo número, o que fai o número 15 da colección. Trátase dunha revista cun elevado prestixio e impacto científico no eido nacional e internacional, estando recollida nas bases de datos e bibliografías máis relevantes no eido das humanidades. Frecuentemente reseñada en publicacións internacionais como The James Joyce Literary Supplement ou James Joyce Quarterly, a publicación inclúe neste novo número contribucións de expertos nacionais e internacionais na obra do escritor irlandés, así como reseñas sobre publicacións e eventos académicos recentes relacionados coa figura e o estudo da obra de James Joyce. Papers on Joyce está avalada pola Asociación Española James Joyce da que é secretaria a profesora do Departamento de Filoloxía Inglesa e Alemá da USC Margarita Estévez.