Uniemprende retoma as xornadas de motivación empresarial no Campus de Lugo

Uniemprende-Lugo reactiva a súa actividade co comezo do curso académico e pon en marcha unhas novas xornadas de motivación empresarial para os vindeiros meses. A actividade realizarase no Campus de Lugo e enmárcanse dentro dos obxectivos do programa Uniemprende da USC para difundir a cultura emprendedora entre a comunidade universitaria. O primeiro dos seminarios para a Difusión e Creación de Empresas terá lugar este mércores 20 na Facultade de ADE coa participación duns 70 alumnos da licenciatura. A finalidade básica desta iniciativa é a de amosar, a través de exemplos de experiencias reais de emprendedores, cómo se xeran as ideas empresariais para demostrar que calquera persoa pode realizar un proxecto empresarial. O contido da xornada estrutúrase en tres partes: o estudo da figura do emprendedor, o traballo sobre a idea de negocio e o xeito de facer realidade e poñer en funcionamento a empresa.

Despois desta primeira iniciativa, Uniemprende dará continuidade ás xornadas de motivación durante o mes de novembro na Escola Politécnica Superior do campus lucense.