A USC refinancia a débeda “cumprindo cos compromisos asumidos no programa de goberno”
O Consello de Goberno deu este xoves o seu visto bo ao orzamento da USC para 2019, cuxo importe ascende a 244,67 millóns de euros e que é o resultado dun novo modelo de refinanciamento da débeda que leva aparellado un investimento estratéxico asociado á redución ou aforro de custes a medio e longo prazo. Este novo modelo, que en palabras do reitor “cumpre cos compromisos asumidos no programa de goberno”, favorece a racionalización de recursos de maneira que permite dar xa os primeiros pasos para reducir a precariedade do seu cadro de persoal coa aprobación dunha Oferta de Emprego Público de 163 prazas de PAS –22 de novo ingreso e 141 para a estabilización de persoal–, unha das maiores convocatorias na historia da universidade compostelá.
As contas aprobadas para 2019 definen ademais entre os seus obxectivos a normalización e redución dos incrementos producidos nos Capítulo I e VI relativos ao persoal; a redución do gasto corrente en 2 millóns de euros nos próximos catro anos; o incremento dos ingresos mediante a revisión de canons e das tarifas de servizos e a busca de alianzas con outras Administracións para aforrar e racionalizar custos.
Planificación académica e formación O Consello aprobou tamén a proposta de normativa de Planificación Académica Anual (PAA), o instrumento que permite formular a oferta de titulacións oficiais da universidade ao establecer criterios de actuación comúns dos distintos axentes que interveñen no proceso, así como o regulamento de xestión do Programa de Formación de Persoal de Administración e Servizos. Respecto deste último, a proposta deixa constancia da importancia da formación do persoal como un “elemento estratéxico para incrementar a produtividade dos empregados públicos e da organización no seu conxunto, ademais dun factor básico para o desenvolvemento profesional e persoal dos seus empregados”.
Incapacidade temporal Por outra banda, hoxe acordouse que o Persoal Docente e Investigador e o de Administración e Servizos da USC que se atope en situación legal de incapacidade temporal percibirá o cen por cen das retribucións ordinarias correspondentes ao mes de inicio da incapacidade temporal (IT). Recupérase así o acordado previamente na negociación coas Mesas Xerais do Persoal Docente e Investigador e do Persoal de Administración e Servizos.
O Consello aprobou igualmente o acordo de devengo de retribucións en situación de incapacidade temporal polo que se percibirán os atrasos correspondentes unha vez superada esa situación, previa solicitude, cando durante a IT perfeccione ou adquira un novo complemento persoal (trienios, complementos por experiencia docente, tramos investigadores ou outros complementos adicionais).