A USC volve iniciar a busca de proxectos empresariais innovadores
A viabilidade do proxecto, a grao de innovación dos produtos ou servizos ofrecidos, o volume de emprego proxectado, o seu carácter multidisciplinar ou a súa atención ás políticas de igualdade son os criterios que valorará o xurado do Concurso de Proxectos Empresariais Innovadores da USC, que acaba de abrir o prazo de presentación de propostas para a súa undécima edición. A convocatoria, que permanecerá aberta ata o 28 de febreiro, diríxese ás tres universidades galegas e aos centros asociados da UNED en Galicia, así como a empresas constituídas ao longo de 2010 que presenten un proxecto empresarial innovador. Os grupos ou persoas interesadas en participar na convocatoria deberán presentar unha memoria descritiva do proxecto empresarial, ben en Santiago ou en Lugo. A convocatoria contempla un primeiro premio de 5.000 euros e ata outros 24.000 de préstamos participativo a cargo de Unirisco Galicia SRC e un segundo de 3.000 euros. Ademais establecéronse outras tres categorías que recibirán 2.000 euros cadansúa por iniciativas de Empresa Xove, Muller Emprendedora e Proxecto Emprendemento Social. O obxectivo da iniciativa é impulsar a creación de empresas innovadoras promovidas por estudantes, licenciados ou investigadores, así como a innovación empresarial e a xeración de emprego. Así, a convocatoria está aberta tanto a estudantes e titulados con independencia da área de coñecemento que individualmente ou en equipo teñan un proxecto empresarial innovador con potencialidade para converterse nunha empresa. Tamén poderán concorrer doutores, doutorandos, persoal de investigación e alumnos de terceiro ciclo que traballen en calquera centro de investigación galego. Xunto co currículo dos promotores, a documentación a presentar incluirá unha memoria descritiva do proxecto na que conste o título, sector ao que pertence, produtos ou servizos ofertados, análise da competencia, plan comercial e de marketing, recursos humanos, plan de investimentos e financiamento e conta de resultados, sempre tendo en conta un horizonte temporal de cinco anos. Para acadar máis información, está dispoñible á páxina web do programa Uniemprende ou http://www.uniemprende.es/xi-concurso-de-proyectos-empresariales-innovadores-de-la-usc.