Un verán de ciencia

Os sesenta estudantes de primeiro curso de Bacharelato de toda España que participan na sexta edición dos Campus Científicos de Verán chegaron este luns á USC. No Salón de Actos do Colexio Maior Fonseca o grupo foi recibido polo vicerreitor de Comunicación e Coordinación, Xosé Pereira, e o coordinador deste ciclo, Luís Hervella. Os campus científicos organízaos o Ministerio de Educación, Cultura e Deportes e a Fundación Española para a Ciencia e a Tecnoloxía (FECYT) co patrocinio de Obra Social la Caixa e a colaboración de 16 universidades pertencentes aos Campus de Excelencia Internacional certificados en 2011 nas que teñen lugar as estadías. O seu obxectivo é incentivar o acceso dos estudantes a titulacións científico-técnicas e apoiar a permanencia no primeiro ano dos estudos de Grao para consolidar as vocacións nestes ámbitos. A experiencia permitiralle ao estudantado concibir o coñecemento científico como un saber integrado que se estrutura en distintas áreas, así como a súa aplicabilidade na resolución de problemas en diversos campos da investigación e da innovación. A iniciativa posibilitará tamén transmitir aos estudantes a experiencia científica directa, os valores, fundamentos e procesos metodolóxicos da ciencia, conectar a vida non universitaria e a universitaria e potenciar a convivencia entre estudantes de diferentes comunidades autónomas. Na USC o alumnado poderá participar nos proxectos ‘A sustentabilidade do ciclo da auga: Un dos 21 retos do século XXI’, ‘Buscando as partículas más enerxéticas do Universo’, ‘A maxia dos hidroxeles’ e ‘MathematiCSI: Mathematical Scene Investigation’ que dirixen, respectivamente, Gumersindo Feijoo Costa, Ricardo Vázquez López e Pablo Vázquez Regueiro, Francisco Javier Otero Espinar e Mª. Victoria Otero Espinar. A actividade estenderase entre o 29 de xuño e o 25 de xullo. A esta primeira quenda sumaranse na segunda quincena outros 60 estudantes de 4º de ESO divididos tamén en dúas quendas dunha semana. Foto Servimav-USC