A través do TFM, búscase simular unha actividade profesional no ámbito científico, técnico ou de xestión, permitíndolle así complementar a súa preparación académica.
Esta materia, coa maior carga lectiva do programa (18 ECTS, equivalentes a aproximadamente tres meses de traballo), require que o estudante acorde un tema de traballo en colaboración cun profesor da titulación (titor académico) e, cando corresponda, cun titor profesional do ámbito empresarial ou da administración.
O TFM representa o proxecto final de especialización do estudante, no que aplica e demostra as súas competencias nunha área de coñecemento específica.
Acceso aos mellores TFM
Podes acceder a unha selección dos mellores TFM da titulación, ben por acadar as maiores cualificacións ou ben porque obtiveron diversos galardóns como o Premio VIAQUA ou outras distincións concedidas por outras empresas ou organismos.
Valoración do TFM realizada polos titulados
Nunha enquisa realizada a máis de 60 egresados de 10 promocións ao longo da década 2010-2020, recompiláronse as súas valoracións sobre diversos aspectos da titulación. En relación co TFM, destaca o seu papel fundamental, sendo a materia mellor valorada en termos de satisfacción.
A continuación, preséntanse algúns dos comentarios recollidos:
- “No TFM é onde máis aprendín e máis posibilidades laborais obtiven”.
- “A realización do TFM foi unha grande experiencia tanto desde o punto de vista persoal como profesional. Aprendín moitísimo e axudoume realmente a saber a que quería dedicarme no futuro”.
- “Ao estar a traballar ao mesmo tempo na empresa serviume de grande aprendizaxe para conectar parte dos coñecementos do Máster no mundo laboral”.
- “Realicei o TFM dentro dun grupo de investigación, o cal me serviu para desenvolver a miña tese, así que, baixo o meu punto de vista, foi un acerto”.
- “A mellor achega do Máster. Poder realizar o TFM nun grupo de investigación punteiro axudoume a crecer e a saír da zona de confort. Aprendín moito”.