A sanidade vexetal centra este venres un foro de debate na Escola Politécnica Superior do Campus Terra da USC

A sanidade vexetal, a súa regulación e a problemática asociada centrarán este venres a temática da segunda sesión do ciclo de conferencias forestais organizado pola Escola Politécnica Superior do Campus Terra da USC, un coloquio que se desenvolverá, a partir das 12.00 horas, na sala de xuntas do centro universitario lugués, e que estará moderado pola profesora Cristina Cabaleiro Sobrino.

O enxeñeiro forestal do Servizo de Montes de Pontevedra Agustín Blond Arredondo, o enxeñeiro agrónomo e responsable de medio ambiente e regulamentación do grupo empresarial Agroamb, Alberto Amador García, e a profesora do Departamento de Produción Vexetal de Proxectos de Enxeñaría da USC na EPS María José Lombardero Díaz, integran a quenda de relatores que participará neste foro. Ao remate das intervencións, comezará un debate aberto, durante o que o público presente poderá trasladar as preguntas que considere.