O Campus Terra mantén aberta a inscrición para as V Xornadas XuvenCiencia para Profesorado ata o 30 de setembro

O Campus Terra da USC oferta 75 prazas destinadas a profesorado de Ensino Medio para participar nas V Xornadas XuvenCiencia para Profesorado nas que os e as inscritos/as recibirán formación, por parte de profesorado universitario, que lles permita aprender a manexar kits educativos que despois poderán empregar nas súas clases.

Nesta nova edición, o profesorado de Ensino Medio recibirá a formación en catro sesións que terán lugar os venres 19 e 26 de outubro, 18 de xaneiro e 22 de marzo en horario de 17.00 a 21.00h. O prezo de matrícula para estas xornadas é de 15 € e a inscrición pode formalizarse a través deste formulario electrónico ata o 30 de setembro.

As V Xornadas XuvenCiencia para profesorado son parte do Proxecto “XuvenCiencia - Fago, logo aprendo” financiado pola Fundación Española para la Ciencia y la Tecnología - Ministerio de Economía, Industria y Competitividad (FECYT).