Rosa Mosquera reivindica as prácticas agroforestais na universidade estadounidense de Cornell

A catedrática da USC no Campus Terra, Rosa Mosquera, vén de presentar un relatorio na Universidade neoiorquina de Cornell no que reivindicou o incremento das prácticas agroforestais no contexto europeo no marco dunha reunión de traballo verbo do cambio climático.

Os sistemas agroforestais son un tipo de práctica de climate-smart agriculture, que consisten en introducir deliberadamente vexetación leñosa (árbores ou arbustos) en cultivos agrícolas e/ou gandeiros, para beneficiarse das resultantes interaccións ecolóxicas  e económicas, contribuíndo, por exemplo, a mitigar o quecemento da terra.

Mosquera é coordinadora do proxecto AFINET (Redes de Innovación Agroforestal), unha rede temática destinada a promover o intercambio e a transferencia de coñecemento entre científicos e profesionais dedicados ao sector agroforestal. AFINET actúa a nivel europeo para pór en práctica os resultados de diferentes investigacións e promover ideas innovadoras que axuden aos profesionais a superar desafíos e problemas. Este consorcio atópase formado por trece socios de nove países. AFINET xa celebrou varias reunións para debater con gandeiros, institucións e investigadores accións encamiñadas a tratar de combater o cambio climático.