Un total de 48 xadrecistas galegos participaron no Campionato Galego universitario de Xadrez

Un total de 48 xadrecistas das tres universidades galegas participaron no Campionato Galego universitario de Xadrez que se celebrou os pasados xoves 22 e venres 23 no Centro de Estudos Avanzados da USC. Nestas competicións, organizadas pola Área de Deportes dependente da Vicerreitoría de Cultura da USC, seleccionáronse aos dous mellores xogadores federados da universidade compostelá, Xulio Torrado e Eduardo García, como representantes desta institución docente no Campionato de España universitario de Xadrez que terá lugar en Córdoba do 7 ao 11 de maio.
O campionato dividiuse en dúas categorías, para diferenciar aos xadrecistas federados dos afeccionados, nas que resultaron gañadores o estudante da Universidade da Coruña, Antonio Pazos, e o PAS da USC, Xesús Feas, respectivamente. Realizado en colaboración coa Dirección Xeral de Deportes da Xunta de Galicia e as outras universidades galegas, este campionato seguiu o sistema suízo de xogo con ritmo para as partidas de 30 minutos máis 30 segundos por xogada.