Abel Lorenzo-Rodríguez e Gael Proupín gañan a novena edición do concurso literario Mazarelos de Filoloxía

O acto de entrega dos premios desenvolveuse este luns no salón de actos da Facultade de Filoloxía, presidido pola vicerreitora de Estudantes e Cultura, Pilar Murias, quen estivo acompañada polo secretario xeral de Política Lingüística, Valentín García; o decano da Facultade de Filoloxía, Elias Feijo, e o responsable do Servizo de Normalización Lingüística da USC, Manuel Núñez Singala. O evento incluíu a actuación musical de Mondra.

Gael Uxío Proupín Cantelar xa gañara a edición de 2022 do certame, co relato titulado ‘Pater familias’. En anteriores edicións obtiveron premios no certame autoras e autores que posteriormente continuaron a súa carreira creativa coa publicación de obras literarias, como é o caso de Arancha Nogueira, que obtivo o primeiro premio en 2017 e 2018 ou de Lois Alcaide, que obtivo o segundo en 2018.

O concurso naceu co obxectivo de fomentar a creatividade da mocidade universitaria e de desenvolver a súa capacidade de expresión en lingua galega, así como para contribuír a descubrir potenciais figuras deste eido da cultura. O nome do certame lembra e homenaxea as raíces da Facultade, que estivo situada na praza de Mazarelos, e mesmo da Universidade e da propia Compostela.