Aberto o prazo das bolsas de Sustentabilidade, Participación e Integración Universitaria e do programa USC en Transición

Cunha oferta de 21 bolsas para o Campus de Santiago e 6 para o de Lugo, os estudantes da USC xa poden inscribirse na oitava edición das Bolsas de Sustentabilidade, Participación e Integración Universitaria do curso 2011-2012. Trátase dunha iniciativa programada conxuntamente pola Coordinación do Plan de Desenvolvemento Sostible dependente da Vicerreitoría de Responsabilidade Social e Calidade e polo Servizo de Participación e Integración Universitaria da Vicerreitoría de Estudantes, Cultura e Formación Continua. O prazo de solicitude permanecerá aberto ata o día 7 de outubro O obxectivo principal destas bolsas é o desenvolvemento, nas facultades e escolas universitarias da USC, de actividades relacionadas co medio ambiente e o desenvolvemento sostible. Ademais, os bolseiros colaborarán activamente na difusión entre todos os membros da comunidade universitaria de accións solidarias emprendidas dende o Servizo de Participación e Integración Universitaria e dende a Coordinación do Plan de Desenvolvemento Sostible. USC en Transición Por outra banda, a Coordinación do Plan de Desenvolvemento Sostible convoca 9 bolsas (6 no campus de Santiago e 3 no de Lugo) para a colaboración no Programa USC en Transición. A súa finalidade é dinamizar á comunidade universitaria da institución académica para promover modelos de vida máis sostibles que contribúan a reducir a pegada e a débeda ecolóxica da universidade, reforzando a súa vez o sentimento de comunidade. Neste marco, o papel e o traballo destes bolseiros, constituirá o punto de partida do Programa USC en Transición, colaborando no deseño e execución das actividades necesarias para dar a coñecer este programa e contribuír ao seu éxito. Os estudantes que desexen solicitar estas bolsas deberán presentar as instancias e a documentación necesaria nalgún dos rexistros xerais da USC, dentro dos prazos sinalados na convocatoria. Para acadar máis información, as persoas interesadas poden dirixirse á paxina web do Plan de Desenvolvemento Sostible.