O alcalde de Ferrol visita as instalacións da Estación de Bioloxía Mariña da Graña

A Estación de Bioloxía Mariña da Graña da USC recibiu a visita do alcalde de Ferrol, José M. Rey, onde ademais de coñecer as instalacións e labor deste centro de investigación puido coñecer as particularidades do Campus de Excelencia Internacional Campus do mar, no que a USC participa xunto coas outras dúas universidades galegas e outros órganos de investigación. No encontro, participaron o director da Estación e da Área de Proxección Social e Cultura Científica e Tecnolóxica do Campus do Mar, Victoriano Urgorri; o director de Campus do Mar, o profesor da Universidade de Vigo Emilio Fernández; e o director da Área de Transferencia de Campus do Mar, o profesor da Universidade da Coruña Luis Fernández. Os tres membros do equipo de goberno de Campus do Mar transmitíronlle ao alcalde as principais particularidades do proxecto distinguido polo Ministerio de Educación en outubro de 2010, que ten como obxectivo nuclear á sociedade galega arredor das súas universidades e centros de investigación coa finalidade de xerar un polo de atracción de talento a escala internacional. A través da mellora da calidade investigadora e docente, esta iniciativa permitirá potenciar a transferencia de coñecemento cara aos sectores produtivos e ás administracións. Neste contexto, os tres representantes de Campus do Mar ofrecéronlle ao Concello de Ferrol a posibilidade de realizar accións potenciais conxuntas e asesoramento en cuestións de temática mariña e marítima así como a organización de actividades formativas e divulgativas, a definición de programas de prácticas preprofesionais ou a colaboración en programas de captación de talento.

Na visita tamén estiveron presentes a subdirectora da Estación, Celia Besteiro; e o xefe e subxefe do centro, Guillermo Díaz e Alexandre García, respectivamente.