O alcalde Xosé Sánchez Bugallo despediuse institucionalmente do reitor compostelán

O reitor Juan Casares recibiu este mércores en San Xerome ao alcalde en funcións do Concello de Santiago, Xosé Sánchez Bugallo, que acudiu á Reitoría compostelá a despedirse institucionalmente, logo dos resultados colectados nas pasadas eleccións municipais. Logo da xuntanza co reitor, nun encontro cos medios de comunicación Sánchez Bugallo expresou a súa vontade de continuar “pelexando a prol dos intereses de Santiago e a súa Universidade, xa que ao fin e ao cabo son a mesma cousa”. Trátase en opinión do alcalde en funcións dunha colaboración “ que contribúe ao desenvolvemento social da cidade”, e nese contexto a USC é “un socio fundamental” tanto “polo que fai como polo que representa” engadiu. O reitor Juan Casares, pola súa banda, agradeceu a boa disposición mostrada pola alcaldía compostelá, “sempre atopei máis que un alcalde, un compañeiro de traballo, e apoio”.