Nova andaina do proxecto de hortos urbanos da USC

A Oficina de Desenvolvemento Sostible da USC reinicia o proxecto de hortos urbanos coaorganización dun obradoiro de conservación de sementes os días 24 e 25 de setembro en Santiago e Lugo, respectivamente. A recuperación de saberes tradicionais ligados á selección e conservación de sementes cobra importancia nun contexto de redución da biodiversidade mundial de sementes, que foi parella á promoción do monocultivo e á crecente dependencia de agroquímicos durante o último século. Este primeiro obradoiro será impartido ás 17.00 horas nas datas previstas nas cociñas do Colexio Maior Fonseca en Santiago e da Residencia Universitaria Bal y Gay en Lugo. A inscrición será de balde (achega voluntaria de 2€ para material) e para facela efectiva haberá que enviar un correo a entransicion [at] usc.es (entransicion[at]usc[dot]es) indicando nome completo, colectivo ao que se pertence (estudante, PDI e PAS), centro de estudos ou traballo e correo electrónico. As prazas serán limitadas e cubriranse por orde de inscrición, dando prioridade aos membros da USC (data límite de inscrición en Santiago o 23 de setembro ás 12.00, en Lugo o 24 á mesma hora). Hortos urbanos O programa comezou o pasado curso como parte de ‘USC en transición’ co obxecto de promover a creación de grupos de persoas interesadas en participar nalgún dos hortos existentes ou, de darse as condicións, crear o seu propio. Ademais das actividades nos hortos, ofértase un programa formativo que combina os coñecementos tradicionais e os académicos mediante a realización de obradoiros prácticos, abertos á comunidade universitaria, e seminarios teóricos para o público en xeral.