Atopan relación entre determinadas actividades de tempo libre e o risco de cancro de pulmón

Dedicar o tempo libre ao bricolaxe, o modelismo ou a pintura incrementa considerablemente o risco de padecer un cancro de pulmón. Así o aseguran investigadores da Universidade de Santiago nun estudo publicado pola revista Epidemiology, unha das máis prestixiosas do mundo no seu campo. Estes especialistas da Área de Medicina Preventiva e Saúde Pública da USC observaron en preto de mil suxeitos que a realización das citadas actividades comporta case tres veces máis risco de cancro pulmonar xa que implica a exposición continuada a solventes orgánicos, vernices, po de madeira ou colas, sustancias cancroxénicas cando se está exposto a logo prazo. O estudo comparativo realizouse en 990 individuos, 442 con cancro pulmonar e 548 sen el, recrutados no Hospital Clínico Universitario de Santiago e no Complexo Hospitalario Universitario de Ourense. Financiado polo Fondo de Investigacións Sanitarias, o traballo confirma os resultados observados nun estudo de menor mostra publicados na mesma revista en 2002 que formaran parte da tese doutoral do profesor Alberto Ruano Raviña que, xunto con Juan Miguel Barros Dios, asina o artigo. A Área de Medicina Preventiva e Saúde Pública á que pertencen os dous investigadores principais da investigación é nodo do CIBER de Epidemioloxía Preventiva e Saúde Pública, entidade financiada polo Instituto de Saúde Carlos III á que pertencen os grupos de Epidemioloxía e Saúde Pública máis competitivos de España.