A Aula Profesional da ETSE incorporará actividades formativas do Colexio Oficial de Enxeñeiros Técnicos Industriais de A Coruña

A Aula Profesional do Grao en Enxeñaría Química da Escola Técnica Superior de Enxeñaría (ETSE) enriquecerase a partir de agora con propostas formativas promovidas polo Colexio Oficial de Enxeñeiros Técnicos Industriais de A Coruña (COETICOR).

Así quedou acordado na sinatura do convenio de colaboración que tivo lugar este mércores en San Xerome por parte do reitor Antonio López e do decano do Colexio e presidente da delegación en Compostela, Macario Yebra Lemos e Juan Carlos Muñiz Abuín, respectivamente. No acto estiveron ademais presentes a directora da ETSE, Julia González Álvarez, e a coordinadora do Grao en Enxeñaría Química, Almudena Hospido Quintana.

A Aula Profesional da ETSE é unha materia obrigatoria de 6 ECTS do Grao en Enxeñaría Química que complementa a formación científico-técnica do estudantado cunha serie de actividades que buscan a mellora da súa formación en competencias de tipo transversal ou en desafíos recentes do entorno profesional ao que se vai incorporar á finalización do título.

Co convenio asinado este mércores, o COETICOR trasladaralle á coordinación do Grao en Enxeñaría Química a previsión de actividades formativas que considera axeitadas para a súa vinculación coa Aula Profesional da ETSE, que revisará a proposta e validará ou establecerá (de non existir) os mecanismos de avaliación pertinentes. Pola súa banda, o COETICOR establecerá a reserva de prazas dispoñibles en cada caso para o estudantado da ETSE.

As actividades de tipo xornadas serán sen custo tanto para as persoas colexiadas como para a comunidade da ETSE, e os cursos gozarán dunha subvención.