Avanzan na procura de biomarcadores en plasma que permitirán adiantar o coñecemento do risco de padecer alzhéimer
Os recentes avances técnicos na análise de sangue periférica permitiron a cuantificación precisa de biomarcadores da enfermidade de Alzhéimer nas primeiras etapas da súa evolución de forma económica, non invasiva e segura. Agora, persoal investigador do Instituto de Psicoloxía da USC e do IDIS vén de avanzar resultados nesta doenza sobre a capacidade de diferenciación de diferentes marcadores en plasma (obtido a través de mostras de sangue). O obxectivo principal deste estudo foi contribuír á caracterización clínico-biolóxica das etapas iniciais do deterioro cognitivo mediante a medición de biomarcadores sanguíneos e neuroestruturais da enfermidade en grupos de persoas participantes clasificadas segundo o seu fenotipo clínico cognitivo.
Dos 6 biomarcadores de proteínas alteradas analizados o p-tau217 e o p-tau181, por esta orde, amosaron unha elevada capacidade de asociación e, polo tanto, confírmanse como “os mellores candidatos para dispoñer en breve de biomarcadores en plasma capaces de identificar o risco de padecer a enfermidade nun período que pode chegar aos 10-15 anos antes de se desenvolver”, explica o profesor Pereiro.
O traballo realizouse con participantes de Galicia do estudo lonxitudinal Compostela Aging study (CompAS), que ten analizado xa 3 cohortes con seguimentos de entre 5-7 anos cada unha. A investigación, liderada por Arturo X. Pereiro, Montse Zurrón, Fernando Díaz e Cristina Lojo, do grupo de investigación en Neurociencia Cognitiva e Psicoxerontoloxía do Instituto de Psicoloxía da USC, conta coa colaboración de grupos da USC, do CIMUS, e do IDIS.
Este sería o primeiro estudo en España con marcadores deste tipo en maiores en etapas presintomáticas da enfermidade, por tanto, cando aínda non cumpren os criterios diagnósticos dunha demencia, a diferenza do publicado por persoal investigador do Hospital del Mar Research Institute e do Barcelonaβeta Brain Research Center (BBRC) vinculado á Fundación Pasqual Maragall que incluía a persoas con demencia. “O noso estudo achega valor adicional aos resultados informados nese primeiro traballo porque analiza as asociacións deses marcadores con probas de neuroimaxe e síntomas clínicos en etapas máis temperás, presintomáticas e prodrómicas, en persoas potencialmente en risco de padecer a enfermidade no futuro”, explica Pereiro,
A investigación ‘Biomarcadores plasmáticos e neuroestruturais na caracterización clínico-biolóxica das primeiras etapas do continuo da enfermidade de Alzhéimer: achados do Compostela Aging Study‘ (Plasma and neurostructural biomarkers in the clinical-biologica characterization of early stages of the Alzheimer’s disease continuum: findings from the Compostela Aging Study) conta con financiamento do Ministerio de Ciencia, Innovación e Universidades e da Axencia Galega de Innovación. O estudo foi xa aceptado para publicarse na revista científica The Journal of Prevention of Alzheimer's Disease.