BioIncubaTech impulsa máis de 150 xuntanzas en liña no seu primeiro Biomatch
BioMatch, o evento destinado a impulsar a xeración de novos contactos profesionais a través de citas rápidas entre empresas incubadas con outras entidades, acaba de celebrar a súa primeira sesión en liña impulsada pola incubadora de alta tecnoloxía BioIncubaTech e o Clúster Tecnolóxico Empresarial das Ciencias da Vida Bioga. A finalidade desta iniciativa na que toma parte a USC é xerar sinerxías e novos proxectos de colaboración entre as entidades participantes.
No evento tomaron parte un total de 53 entidades en seis rondas de xuntanzas, o que deu lugar a un total de 156 citas. Con estas xuntanzas procúrase que as empresas participantes se dean a coñecer e poidan crear unha rede de contactos no ecosistema biotech a través do networking, alén de xerar novas oportunidades de negocio.
O encontro iniciouse coa benvida de José Luis Villaverde, director da Área de Valorización, Transferencia e Emprendemento da USC e responsable de BioIncubaTech, xunto a Loli Pereiro, xerente de Bioga. A continuación, desenvolveuse o relatorio ‘A hibridación tecnolóxica como base da nova cadea de valor en saúde’, a cargo de Sergio Muñoz Lezcano, responsable de Innovación e Emprendemento e Coordinador da Plataforma Española de Innovación en Tecnoloxía Sanitaria. Acto seguido, comezaron as reunións “one-to-one”, de 20 minutos.
Iniciativa única en España
BioIncubaTech é a primeira bioincubadora de Galicia e a única en España especializada en proxectos biotecnolóxicos aplicados á saúde e ao sector agroalimentario. Esta iniciativa ofrece dotación de infraestruturas e programas de incubación e aceleración para conseguir atraer talento emprendedor e resultados de investigación de todo o mundo a Galicia. BioIncubaTech está promovida pola USC en colaboración con Uninova e a Cámara de Comercio de Santiago, alén de ser financiada pola Fundación INCYDE na súa convocatoria 2018 de ‘Incubadoras de Alta Tecnoloxía para o fomento da Innovación e a transferencia de tecnoloxía a micropemes’ (Fondos FE-DER), e cofinanciada pola Axencia Galega de Innovación (GAIN) da Xunta de Galicia.
Bioincubatech forma parte do Polo de Innovación en Biotecnoloxía que se está a crear en Santiago de Compostela, onde se instalará o centro de fabricación avanzada Sionlla Biotech, que se integrará no Hub de innovación dixital DATAlife liderado por Bioga.