O Centro de Linguas Modernas comeza o día 13 cos test de nivel

A vindeira semana o Centro de Linguas Modernas (CLM) arranca a súa programación de cursos de idiomas coa celebración dos test de nivel nos campus de Santiago e Lugo. Alemán, chinés, francés, inglés, italiano, portugués e xaponés serán os primeiros en dar a oportunidade de comprobar o grao de coñecemento destas linguas a aquelas persoas que desexen matricularse nos cursos semestrais do CLM.

Os resultados deste test poderán coñecerse a través da Secretaría Virtual, mentres que o primeiro prazo de matrícula para os cursos deste semestre rematará o 19 de setembro. Ademais dos idiomas xa mencionados o CLM oferta a posibilidade de cursar checo, catalán, Español como Lingua Estranxeira (ELE) e galego para non galegofalantes.

A proposta de calendarios que realiza semestralmente o Centro de Linguas da USC tenta ofrecer flexibilidade para compaxinar os estudos universitarios cos de idiomas, sendo este último un requisito necesario para obter o título de grao na USC así como para solicitar estadías no estranxeiro. Ademais das vantaxes inherentes á aprendizaxe doutros idiomas, os que imparte o CLM están recoñecidos con un crédito por cada 25 horas cursadas.