Comeza unha nova campaña de compostaxe nas residencias do SUR
Co comezo do novo curso académico, a Coordinación do Plan de Desenvolvemento Sostible da USC pon de novo en marcha o proxecto de xestión de residuos participada en residencias. Trátase así de impulsar a participación de todos os residentes na xestión de residuos das cociñas e, concretamente, da compostaxe como método alternativo de tratamento á incineración dos residuos orgánicos. A campaña desenvolverase na Residencia Universitaria Monte da Condesa e no Colexio Maior Fonseca e para iso contarase co apoio técnico de educadoras ambientais de Feitoría Verde. A compostaxe é un proceso de degradación natural de residuos orgánicos que permite obter o compost, emenda orgánica do solo con múltiples aplicacións. Mediante este proceso aprovéitanse parte dos residuos, xerados fundamentalmente nas cociñas, ademais de empregarse restos de poda e follas que o Servizo de Xardinería proporciona periodicamente. Para facer partícipes aos residentes nesta campaña desenvolveranse unha serie de actividades de educación ambiental que comezarán o vindeiro xoves 13 ás 20.00 horas na sala do piano da Residencia Monte da Condesa cunha charla na que se presentará a campaña de compostaxe. Esta actividade repetirase o luns 17 á mesma hora no salón de actos do Colexio Maior Fonseca. No mes de outubro está prevista ademais unha visita á Illa de Arousa para coñecer de primeira man as vantaxes da compostaxe. Este concello conta dende hai anos cun programa de autocompostaxe financiado polo programa comunitario LIFE-Medio Ambiente. Apoio ás residencias
A Coordinación do Plan de Desenvolvemento Sostible procura ofrecer un apoio constante ás residencias do SUR en cuestións medio ambientais, ben sexa a través de dotación de infraestruturas (como colectores para a separación selectiva de residuos nas dependencias interiores) ou de material divulgativo para os paneis dos centros. Na mesma orde de cousas, promove o uso de medios de transporte alternativo ao automóbil entre os residentes, dotando en 2011 de 12 novas bicicletas á Residencia Burgo das Nacións e doutras 12 á Monte da Condesa.