Comezou en Santiago o 'XXXV International Meeting on Fundamental Physics' coa asistencia de expertos de todo o mundo

O ‘XXXV International Meeting on Fundamental Physics’ comezou este luns 28 en San Martín Pinario onde se vai desenvolver ata o vindeiro venres 1 de xuño organizado polos profesores do Departamento de Física de Partículas da USC, Bernardo Adeva, Jaime Álvarez Muñiz, Juan Jose Saborido e por Ricardo Vazquez, do Instituto Galego de Física de Altas Enerxías (IGFAE) da USC.
Expertos de todo o mundo analizarán as principais cuestións e desafíos existentes en Física de Partículas Elementais e Astropartículas, con especial atención ás novas expectativas que se abren co próximo funcionamento do acelerador LHC (gran colisionador de hadróns) do Centro Europeo de Física de Partículas de Xenebra (CERN) e no experimento Auger de raios cósmicos. No transcurso do encontro tamén se estudará o novo experimento CLOUD do CERN que intenta afondar nos fenómenos do cambio climático.
Tanto no LHC como no experimento Auger participan equipos da USC en colaboracións internacionais integradas por máis de 30 institucións e mais de 1000 investigadores. Para acadar máis información, as persoas interesadas poden consultar a web do encontro (http://fpaxp1.usc.es/~winter/).