Compostela será punto de referencia internacional en setembro para investigadores no eido dos libros de texto e materiais didácticos

Investigadores de máis de corenta países de todo o mundo reúnense os días 3, 4 e 5 de setembro na X International Conference on Textbooks and Educational Media’, que organiza a International Association for Research on Textbooks and Educational Media (IARTEM) en colaboración coa Universidade de Santiago.
A xuntanza vai estar dedicada á análise das identidades local, nacional e transnacional nos libros de texto e nos medios educativos. Así, o encontro diríxese fundamentalmente a investigadores e profesionais relacionados cos materiais didácticos así como a responsables políticos e asociacións de editores de diferentes países.
O debate ao longo dos tres días de xuntanza incidirá nas complexas e múltiples relacións entre o contexto do proceso ensino-aprendizaxe e a socialización de identidades nacionais. Partindo desta premisa, as sesións focalizaranse no proceso de deseño, desenvolvemento, uso e selección de obxectivos dos libros de textos e outros recursos pedagóxicos.
En opinión dos promotores do congreso, “será unha boa ocasión para mostrar os libros de textos e outros medios pedagóxicos como recursos para o desenvolvemento de cidadáns locais, nacionais e transnacionais” ao tempo que promover “unha rede de traballo e construción da sociedade do coñecemento”.
Tanto o programa, como o formulario de inscrición e o formato para a presentación de comunicacións atópase a disposición das persoas interesadas na páxina web http://www.iartem.no/. O prazo para presentar o resumo dos traballos remata o vindeiro 4 de maio.