O Congreso Nacional de Junior Empresa celebra en Santiago a súa trixésima edición

A Asociación Junior Empresa de Santiago (Jemsa) trae a Compostela o Congreso Nacional de Junior Empresa que, baixo o lema ‘Imaxina o teu camiño’, reunirá a empresarios mozos de toda España, estudantes e emprendedores co obxecto de incrementar a súa formación, intercambiar ideas e traballar xuntos. O encontro comezará este xoves 7 co acto inaugural no que se vai celebrar no Colexio de Fonseca a partir das 19.00 horas e no que está prevista a participación da vicerreitora de Economía, Sara Cantorna; o presidente de Red Emprendia, Senén Barro; e unha representación da directiva de Jemsa, do Colexio de Economistas da Coruña e da Consellaría de Educación. Ao longo de tres días falarase sobre emprendemento e máis concretamente sobre coaching ou viveiros de empresas, entre outros asuntos. As intervencións serán abertas aos público previa inscrición. Segundo os seus promotores, o Congreso pretende ser “o evento das ideas, coas que todos poden avanzar, e considerando o emprendemento como motor de crecemento”. Ademais, o encontro suporá unha oportunidade de empuxe ao proxecto de moitas persoas que se queren iniciar ao emprendemento en Galicia, “ofrecéndolles unha senda, colaborando, contribuíndo unidos”. As persoas interesadas poden atopar máis información nas web do Congreso e de Jemsa Santiago.