A conselleira de Universidade visitou os Centros Singulares de investigación e o IGFAE da USC

Acompañada do reitor Antonio López, a conselleira de Educación, Universidade e FP, Carmen Pomar Tojo, coñeceu de primeira man o labor desenvolvido no CiMUS, CiQUS, CiTIUS e no Instituto Galego de Física de Altas Enerxías (IGFAE) da USC, onde desenvolven o seu labor algúns dos científicos máis excelentes do Sistema Universitario Galego co apoio do Goberno da Xunta.

A conselleira Carmen Pomar reafirmou o compromiso do seu departamento coa investigación universitaria mediante o apoio financeiro estable a medio e longo prazo a grupos de investigación e a estruturas supragrupais e á formación e retención do talento. A titular de Educación subliñou o importante traballo que están desenvolvendo os equipos científicos destes centros, que son un dos principais motores da I+D+i en Galicia e, sobre todo, que as súas investigacións se traducen en transferencia de coñecemento que beneficia ao conxunto da sociedade.

CiMUS
O Centro Singular de Investigación en Medicina Molecular e Enfermidades Crónicas céntrase na prevención, o coñecemento e o tratamento de enfermidades crónicas en áreas como cancro, endocrinoloxía, cardiovascular, neurociencia, xenética e bioinformática, nanomedicina ou o desenvolvemento de fármacos. Como resultado dun esforzo por reunir nun só centro a excelente investigación de USC en ciencia biomédica, CiMUS alberga un panel de grupos cun gran potencial en investigación básica (como demostran as publicacións en revistas de impacto como Nature, Science ou Cell) e outros cun compoñente translacional máis forte, cunha gran reputación nos seus campos.

O principal activo de CiMUS é un equipo científico de 30 investigadores principais, varios dos cales foron ou son beneficiarios de axudas ERC, 55 posdoutorados e máis de 100 estudantes predoutorais. O centro promoveu unha spin-off e cada ano logra preto de 20 tese doutorais, 175 publicacións científicas e 3 patentes, ademais de 20 proxectos internacionais en curso.

CiQUS O Centro Singular de Investigación en Química biolóxica e Materiais Moleculares a realiza investigacións de vangarda en química na fronteira entre a bioloxía e a ciencia dos materiais, centrándose en tres áreas principais: química biolóxica e médica, materiais funcionais con aplicación tecnolóxica e tecnoloxías sintéticas para o desenvolvemento sustentable, que están apoiadas polas áreas transversais de química estrutural e química computacional.

O CiQUS alberga a 34 investigadores principais, incluídos 4 beneficiarios de ERC para un total de 5 proxectos de ERC, e mostra unha capacidade de recadación de fondos superior a 5 M € por ano. Publica arredor de 90 artigos por ano nas revistas de factores de maior impacto, ten creadas 3 empresas spin- off e desenvolveu 2 patentes.

CiTIUS
No Centro de Investigación Singular en Tecnoloxías da Información, agrupación estratéxica consolidada, traballan máis de 100 científicos, incluídos 30 investigadores principais, 14 posdoutorais e numerosos estudantes predoutorais. A súa estratexia de investigación diríxese á excelencia no marco de 7 programas científicos: aprendizaxe automática; computación avanzada; e-saúde; procesamento aproximado; robots persoais; sensores autónomos e tecnoloxías da linguaxe natural.

Os investigadores do CiTIUS publican máis de 60 artigos por ano en revistas e congresos indexados (SCI- Scopus) e defenden arredor de 10 teses doutorais por ano. O centro tamén ten 15 licenzas de software e creou dous spin- offs, Situm Technologies e Imagames.

IGFAE O Instituto Galego de Física de Altas Enerxías foi distinguido este ano como Unidade de Excelencia María de Maetzu pola Axencia Estatal de Investigación, sendo o primeiro centro en Galicia en obter esta distinción. Nel traballan 41 investigadores, dos cales 30 son profesores da USC.

A investigación que produce o IGFAE, un instituto mixto de investigación dependente da USC e da Xunta de Galicia creado en 1999, está orientada á ciencia básica dirixida a mellorar a comprensión da estrutura da materia e o Universo, como as súas aplicacións tecnolóxicas en campos moi diversos que inclúen a instrumentación científica avanzada, a tecnoloxía GRID, a microelectrónica, a enerxía solar, etc.